上海农场知青家园网
您好,欢迎访问上海农场知青家园网
查看: 1389|回复: 1

[录音倾听] 173、海派淮海路(下)

[复制链接]
字体大小: 正常 放大
发表于 2019-5-22 09:05:17 | 显示全部楼层 |阅读模式
作者: 撰稿/钱乃荣 朗读/朱贞淼

海派淮海路(下)

撰稿/钱乃荣  朗读/朱贞淼


淮海路2.jpg


    上海历史悠久个商店开辣淮海路浪个,有“金龙绸布,大方绸缎,伟多利食品,老大昌食品、老胡开文笔庄、茂昌眼镜、小吕宋帽店、西门子钟表店、长春花店”咾啥,侪是从解放前一直开到五六十年代,有个延续到80年代,店名保持勿变,开设地点也呒没移动过。淡水路附近个“老胡开文”,专卖纸墨笔砚,尤其是小楷毛笔,堪称一流,我是用搿家小店个毛笔长大个。“西门子钟表店”里,我买过质量最好个上海牌手表,也改装修理过别个手表。还有一家辣陕西南路个唱片店,在50年代还辣卖交关外国唱片,当时辣上海作兴是独家了。
    重庆路口个“旧货商店”,最令人难忘。一头面对重庆南路,一头从长乐路开门,商店四周围面积邪气大。各种旧货侪有,多数采取寄售收佣金方式。大量当年勿流行个解放前个物资,从一些破落门户流散出来,其中勿少精品,辗转他人。从整套红木家具到古瓷器名书画,猎枪,名牌舶来品,衣裳,脚踏车,文化办公用品咾啥,五花八门,长年周转迅速。买卖之间,有说勿尽个心酸,也有淘来勿易个喜悦。有个物事,辣外头市面浪已经难以寻觅,有货者赶快拿去寄卖,急需者辣搿搭买到八成新个旧货,倒也得来全勿费工夫。会淘物事个老懂经,乐疲于此,会发现交关新鲜个旧货。就是进店看看,也会长知识,了解勿少掌故脱仔背后个人情沧桑。
    现在还辣海个上海妇女用品商店,成立于1956年2月,记得之前辣搿块地方原来就开辣多家解放前延续下来个时尚服装店。我1956年考进中学以后一直对搿家当时还呒没打通但是连成一条个大商店感兴趣,但是因为是男小囡,进门有眼难为情,但是后来辣商店转向雁荡路个搿只门口看到挂辣海一大片个“花绢头”,各种花样实在忒㜺,一角六分一条,差勿多每日天侪会有变化,轧满人,侪辣拣,乃末我终于熬勿牢进门细细欣赏。公私合营前后个手帕厂,集中了一批手帕图案个设计师,设计出各种风格个、描绘水准极高个“花绢头”,一批又一批,图案层出勿穷,有国画式个,有西洋油画、水彩画式个,有抽象画个,也有实物写真个。有花鸟,有山水,有静物,有人物,有模仿个西洋画,有各种动物卡通,每条手帕,就是一幅佳画。花绢头柜台前头,成了50年代个时代绘画风格个展览场地,曾经使得多少女青年陶醉过。搿一波手帕艺术个高峰到60年代中期就衰落了。
    新华书店、上海旧书店脱瑞金一路转弯角浪个“泰山文具店”,是我六年当中去得最多个地方。在思南个笡对面,有“上海报刊门市部”,一出新期刊新报纸,里向侪好买着。《电影故事》、《上影画报》十分抢手,《人民文学》、《诗刊》、《文学遗产》咾啥,甚至受众老少个《数学通报》、《中国语文》专业期刊,搿搭侪卖。搿个脱如今个文化告专业期刊买勿到零售个情形有老大个勿同,搿个也反映出当年群众当中文化普及个生气告活力。小书店也多,50年代辣淮海路口个重庆南路头上,还开辣海大众、东新两家小书店。
    照相馆也脱阿拉学生顶相关,因为阿拉小学报名到报考大学,一直要拍报名照咾啥,侪想寻一家好个照相馆拍得好一眼,黄陂南路对过个“蝶来”、重庆中路边个“青鸟”(后称“万象”)侪是老牌著名相馆,阿拉还常常去欣赏搿些照相馆勿断变换个橱窗,里向摆辣海电影明星脱仔其他勿知名个美女倩影。
    淮海电影院附近还有一家“新光光学仪器商店”,辣50年代辰光,看进去有眼神秘兮兮,外面橱窗告里向柜台里侪摆辣勿少仪器,一副知识型个面孔。后来辣70年代以后,就变得邪气亲近起来,当时为了节省照片洗印费,大家流行自家辣屋里向冲印照片,辣自家制作个扩印机里放印照片,所用个洗印液、定影液,照相纸,侪是到新光里去零拷拆买个。辣马路对过,有一家“海影摄影社”,是老底子开辣新城隍庙个“良友照相馆”搬过来个,专门冲印120搭135个黑白照片。当时用名气老响个上海自制个“海鸥58Ⅱ型”照相机,拍摄个135软片照片实在忒小,但是要放大又呒没介多钞票,葛咾辣屋里向珍藏个过去个照相簿浪,家家人家侪贴辣交关3.5cm×2cm个小照片。
    辣辣“上海长春食品商店”个笡对过,有一条短弄堂,外头挂了一块“上海第十二女子中学”的长牌子,我从小学五年级就开始,脱几个欢喜集邮个同学一道,常常出入弄堂里向左转弯个“伟民集邮社”买邮票,还辣辣搿条弄堂里交换邮票,兴趣浓厚。除脱一张一张拿纪字号告特字号个邮票一套一套慢慢叫个集齐,还买一眼民国邮票,特别是当时辰光大家称颂个匈牙利邮票,出得水平交关高,乃末要凑足平常个零用铜钿硬硬头皮去买下来,大家辣互相交流翻看集邮簿子辰光觉着老有台型个。我搿眼邮票逃过“文革”劫难一直保留到现在。
    “上海床上用品公司”个“羽绒被”脱仔各色美丽大方花样个床罩,“益民百货公司”个“培斯塔衬衫”,“开瑞服装店”个各种台型个“茄克衫”,“香港童装店”个“贴花镶式男童装”、“拼花马甲套装”,侪是特色独具个名牌,“康歌电器公司”里五六十年代我经常去买78转告33转个“中国唱片”,当时侪可以试听。80年代我去买立体声唱片、录音机告磁带,买长风牌“带唱机的晶体管收音机”。
    还有一点老牌个商店,记得个有“中华烟行”、“正章实业总公司”、“徐重道国药行”、“古今奶罩公司”、“益大中老年服装商店”。理发美容方面,有著名个“紫罗兰美发厅”、“红玫瑰美发厅”、“白玉兰美容院”,交关小资打扮,从头而起。印象中瑞金路以西个淮海路,更加洋派一些,辣闭塞个年代还能见到一些西洋个餐具告工艺品。
    淮海路个多样化,还表现辣有交关公寓或者弄堂个出口处,一些小摊开辣海,有个只有一个营业者,或者帮人织补,或者卖便宜打折个衣裤裙子,或者卖些蛮有特色个、日常需用个小商品,十分方便住民。有个弄堂门口,还开辣小吃点心排档,像和合坊弄堂口个“生煎馒头”、“咖喱线粉汤”,有口皆碑。淮海路浪也有卖低档货个店,像黄陂路口有一家“宝康”,80年代卖零头布、花边、纽子,卖低档衣裤咾啥家常实用品,因此搿爿是交关人老欢喜进出个商店,有一趟我专门去搿家店买做枕芯用个碎塑料海绵。
    昔日个淮海路,是人民大众购物游逛个好天地,有人脉,接地气。
    淮海路个真正大改造是搿个一趟,如今个淮海路已经面目全非,80年代后期去国外个上海人回到上海再游淮海路,夸张点讲:除了法国梧桐之外,阿拉已经勿认得了。

回复

使用道具 举报

发表于 2019-6-15 18:06:56 | 显示全部楼层

RE: 173、海派淮海路(下)

过去嘎许多年了,作者伊哪能可以记得嘎牢,一样啊佛漏忒,总算佩服伊了!
想当年,本人也在淮海路边上的淡水路太仓路住过20年,后来动迁后又不大再去,以前的淮海路早已淡漠,不想今被作者一番如数家珍,倒也又记起不少,如经常去的电影院,就有淮海,嵩山,国泰电影院。喜欢去的商店有“淮国旧”“全国土特产商店”等。淮海公园,复兴公园,都是常玩之地。这篇文章我已经打印下来了,让亲友们也看看……
回复 支持 反对

使用道具 举报

Archiver|手机版|上海农场知青家园网

GMT+8, 2019-12-6 21:52 , Processed in 0.092926 second(s), 8 queries , Gzip On, Redis On.

Powered by Discuz! X3.4

Copyright © 2001-2019, Tencent Cloud.

快速回复 返回顶部 返回列表